ما هو ملف الكفالة للإعفاء من الخدمة الوطنية؟

 #ملخص دفع #ملف #الكفالة بالتفصيل (عن تجربة)

🔴المرحلة الأولى:

أول شيء تمشي للبلدية، سقسي على مكتب يسموه مكتب التجنيد. لثم قلهم لي راك حاب تستخرج شهادة الكفالة من البلدية، في الأغلب راح يقولولك تستخرج الوثائق التالية ليك ولوالديك:

***أي شيء تخرجو هنا خرج منه نسختين*** 

🔸بطاقات الإقامة

🔸شهادات عدم الخضوع للضرائب

🔸شهادة الحالة العائلية تستخرج من البلدية

🔸شهادات طبية بنسبة عجز كبيرة لكلا الوالدين

🔸شهادة عمل للمعني 

🔸وضعية الإخوة الذكور (عقود الزواج، ووضعيتهم اتجاه الخدمة الوطنية) 

Casorec, Cnas🔸

🔸نسخة عالديبلوم المتحصل عليه او شهادة مدرسية

---------

في الأغلب هذا هو الملف تهزو وترجع بيه للبلدية 

تدفعو تستنا نهارين وترجعلهم انشالله يمدولك #شهادة #كفالة من البلدية وهكا تكون كملت المرحلة الأولى. 

🔴في المرحلة الثانية تتفكر كي قتلك أعمل نسختين من كل وثيقة. 

مليح تمشي تهز النسخة الثانية تعملهم في حافظة وتزيدلهم 

🔸طلب خطي 

🔸وضعية العمل للأبوين " اذا كانو عاملين شهادة عمل، متقاعد شهادة تقاعد، بطال شهادة بطالة" 

🔸زوج صور شمسية 

🔸الدفتر العائلي الأصلي

وتمشي بيهم ل #مكتب #التجنيد في الولاية تاعك، لازم تروح على ال8 تع الصباح. 

تدفع الملف وتستنى يعطوك 

✔️وصل استلام الملف

✔️وبرقية تخليها مغلقة متفتحهاش وتديها لمركز الدرك الوطني ، هوما يفتحوها ويقولولك روح روح ذرك نعيطولك. 

----- 

🔴في المرحلة الثالثة :

تكون قاعد فالدار حتى يعيطولك تع الدرك تمشيلهم وتدي معاك 

زوج شهود فايتين 40 سنة وميكونوش فامي ليك، وتهزو معاكم

🔸بطاقات التعريف

وتزيد تهز معاك

🔸 الدفتر العائلي،

🔸شهادة الحالة المدنية وأي شيء يثبت لي راك أهل للكفالة، مثلا الشهادات الطبية لوالديك

----

يعملو معاك تحقيق ويبعثوك تروح، ترجع في التاريخ لي مكتوب فوصل الإستلام لي مدو هولك فمكتب التجنيد، الي هو فالأغلب يكون بعد 7-8 شهر

ومبروك عليك البطاقة انشالله.